Printer Friendly

Roswitha Mushova-Ndumba: Kutunga nompito dehuguvaro.

Roswitha Mushova-Ndumba kwa muhampuruka mo-1961 ntani kwa kulira pomukunda gwaShighuru moKavango. Age kudiworoka nawa-nawa apa ga kere munona omu nga dana novakwawo konontere doMukuro gwaKavango. "Ose ngatu hongo yikorama notuyiga twerova. Ngatu vatuka koyitji tu ze momema nokuzogana. Ose kwa lirongere kuduga wato noku ka dingura Omama wovakadi mesinya mwina lyomukuro moAngola. Ose kwa lirongere omu natu kwata nomfi morwa momukuro kwa kere mo nomfi dononzi sili unene. Ose kwa hwire kuza komapya nozinyetu oku ngava ka tu ronga omu ava limi mahangu nomu ava lisa nongombe. Pamwe ngatu faura mazuva gavali mosivike tu lise nongombe ano mazuva gatatu tatu zi kosure. Ame kwa kere nomazuva gounona goruhafo."

Eparu eli lyewa kwa hege apa oguhwe va kwere ko mukadi gwauvali ntani yipo va zire va ka kare kumwe namukadawo gomupe. "Siruwo esi awo onane vana hampuruka vanamapange ntani ame na hepa kuvatera onane nava vanona vavali. Eyi kwa popererenge kokukwara nounona-nona; vakadona mondandango zetu ndi momukunda gwetu ngava va kwara kutundilira ponomvhura 15. Moruhura yipo naya kere novatumwa wongereka za-NG ntani kumwe nevatero lyawo yipo na mene sitanda 5 mo-1975."

Umpitisili merongo

Murongwa gokulituramo, Roswitha nga kara nkenye apa gopomuhowo monkondwarongero zawo mosure zopirimere nezi zosekondere. Mokunongonona nondunge dendi, ngereka zaKatolika zomomukunda yipo za mu pere yimaliva yekwafo yokukalirongesa erongo lyosipilili ndi lyokinda poSure zoUmitili zaDobra pepi naVenduka. Mo-1982, age ana kara nonzapo zourongi, Roswitha yipo ga tengwire koKavango aka tameke yirugana yendi yourongi.

Yirugana yaRoswitha poSure zaBunya kwa tetwire unene vatarelinosure yipo va mu kutire moka ka tameka sure zompe zosipili ndi zokinda zaMbambi, apa ga ya rugene ure wonomvhura mbali. Konyima zokuyatwikida elirongo lyendi yipo va mu rundwilire a tunde moRundu a ze koKhena aka tameke sure zaMartin Ndumba zovanona woVaduni pokamba zovakwayita vaSouth Africa, apa gaya kere mukuronasure gokukwateramo gokuhova.

[ILLUSTRATION OMITTED]

"Apa yipo twa ya gwanekerere nomugara gwange gomuCaprivi makura yipo twa likwere mo-1990. Age kwa futire mugondwa kovakurona vange. Eparu kumwe nendi kwa digopere. Age kwa divikwire kwankenye muntu, unene po vakadona novakadi. Kapi na divire asi yisinke nani rugana yipo a lisinte. Ose kwa kere kumwe dogoro mo-1996 makura yipo va mu rundwilire aka ruganene koRundu. Ame name yipo va rundwilirenge ni tengwire koRundu yipo ni ka kare pepi namugara gwange yiyo na ka rongere sirongwa somuvaru poSure zaSauyemwa."

Age kuna kuronga posure ezi yipo ukanguki wendi wa tamekere kuza kokudona. "Mo-1998 yipo na tamekere kuvera unene makura yiyo na hagekere kurugana. Pehagero lyelima mugara gwange yipo ga kwere ko mukadi gwauvali kumwe nokumureta membo lyetu. Ame kwa gusire yikovero yange novana vange yipo twa tundire mo membo. Onane kapi va here asi ni mu sige morwa awo kwa uyungire asi mugara kwa kara nounankondo wokukwara vakadi wovanzi, nye moruhura va yi zuvhire asi mugara kwa retere mukadi aya kare membo lyeeli na kara.

Apa ga verere ame novana vange kapi va tu pulisilire tu ka mu dingure. Age kwa dogorokere mo-1999. Ame kwa tantererenge asi age kwa dogorokere ko-AIDS. Vantu ngava uyunga unene ntani nkenye apa nsene tani ligwanekere nawo, tava pura nge asi morwasinke nina tongamene. Awo ngava uyunga hena asi name ntaantani ni fe morwa mugara gwange ga fa. Ngani lifu nomuga morwa gazara tupu asi, ove omurongi ntani ove va ku kwata uvera ou!"

Evatero lyokutundilira kekoro

Mudigo gedina lyedona kwa mu digoperere Roswitha, makura yipo ga tundire mo moRundu aka kare kembo nozina ponze zodoropa. Age kembo, ukanguki waRoswitha yipo wa zire kokudona. Kapi hena nga vhuru kuuyunga ndi kulya makura yipo va ya mukonderere mosipangero saRundu. Age kwa yi mwene asi ta fu. Ya kere tupu asi kwato hena ehuguvaro, mumbya Roswitha gomugara yipo ga tokwere kumutwara koVenduka. Age kwa muretere kwandokotora gopirifati ogu ga mukonakonene HIV nokuyamugwana asi kwa kara nazo. "Mumbyange kwa hengagwidirenge nokutanterange asi ekoro nalinye kumwe name lya kere ntani ngali vaterange novana vange vatatu wovanona. Ame kwa lizuvhire mukumo morwa age kwa uyungire asi nawa kudiva asi wa kara nazo ndi kwato nokugwana uhaku kupitakana kuza kononganga." Ndokotora nage kwa kere nombudi zongwa zokupa Roswitha. Age kwa mutanterere asi mepakerombili lyewa nokunwa mutji, kuvhura a tupuke nokuparuka eparu lyere ntani lyokukanguka.

Kumwe nevatero lyopamagazaro nopayimaliva, Roswitha nga vhuru kuranda mutji (anti-retroviral treatment) gouhaku wou uvera. Kugunwa nkenye apa, makura rutu rwendi yipo rwa gwene nonkondo. MwaMurongagona 2001, vantu kapi vana kuyipura eyi vana kumona. "Morwasinke ana kumonekera ngesi Roswitha? Age kwa kere ta vere unene. Ngesi ana veruka?" ngava wiza gumwe-gumwe va ya mudingure. "Ame kwa kere nina va mangurukire. Kwa va tanterere. Ame kwa pitire momaudigu. Hambara ni fe, nomutji edi kwa vatererenge ni kare nawa. Kuvhura ni gende, kuvhura ni rugane yininke yoyinzi. Na tamekere kumona asi vantu wopeke kwa kere noudigu wokufana wange, nye kapi va divire omu nava livatera vene."

Kutameka Lironga Eparu moMukunda gwaKavango

Murugani goukalinawa yipo ga wizire aya dingure Roswitha nokumuninka a likwatakane nombungavatero zaLironga Eparu moVenduka za karera po vantu va kara no-AIDS ntani no-HIV. Awo kwa uyungire kombinga zokupwagesa kukara kwawo nokambumburu nokugwanekera nomaudigu gawo. Roswitha kwa mu pere mukumo. "Kutunda apa yipo na gwene egano lyokutulisa po mbungavateli moRundu. Vantu ava va hwire kudingurange kwa kere vakwetu. Vamwe kwa kwere ntani vagara vawo va fa. Awo kwa kere nosinka; mpamwe walye morwa HIV. Vamwe kwa kere nonsigwe. Vamwe kwa kagura HIV ntani vamwe kwa va kundama ntani ame kwa va here navenye." Mbungavatero kwa tamekere nekonakono. Nsene muntu kwa mu kwatekere, ta kara muhameni, nsene kwato, makura ta kara mulizambeli. Mbunga yipo nye za nenepere zi pitakane vantu 100.

Kutunga Nompito dEhuguvaro

Pokutambura edina Kutunga Nompito daKavango dEhuguvaro (Kavango Brighes of Hope), mbunga kwa tamekere kutulisapo noproyeka domomukunda mvhongwa edeuro efirosinka lyemembo, eungomwenyo, nevhukiso ediviso. Ngesi awo kuna kugendesa kombisa zokuninka sopa omu ava ninki va gave nondya dokukanguka kovantu siruwo esi vana kara momukweyo va ndindire nomutji dawo. Ano ava vana kara asi kuvera unene kapi tava vhuru kusiga mambo gawo, mbunga kutuma varugani vefirosinka lyemembo va va twarere nondya nonomutji dawo. Ngesi Nompito daKavango dEhuguvaro kwa kara nombungavatero zovantu va kara no-HIV no-AIDS mwankenye mukundahorowero. Roswitha kukorangeda nkenye mbungavatero zi ninke yiviyauka yokuretesapo yiwizamo ngamoomu nontekera doyikwehidi ndi yihongagura noyitungagura yipo yiviyauka yawo va yi ninkise vene yikarerere po, nye pwa hana yimaliva yokutamekesa eyi udigu.

Kuzigida Ekwafo lyoYiwizamotateko (BIG)

Pokuuyunga nonEw Era sinkwantani, Roswitha ka tumine ezigido lyononkondo va genderere kutura moyirugana Ekwafo lyoYiwizamotateko kovantu va kara no-HIV no-AIDS. Age ka uyungire asi sinzi sovantu va kara no-HIV kwa kara moupyakadi wokupira kukara nomambo gomazuni ndi kudira kugwana mema gokunwa gokukuhuka.

"Vantu kapi tava nu nomutji awo nzara--ukaro wawo tau zonauka unene. Kapi tuna diva asi morwasinke epangero lya hagekera ekwafo kovantu vamwe va kagura kambumburu," yimo ga uyungire. Evatero lyonoproyeka dokuretesapo yiwizamo, ndi noproyeka dokuruganena nondya nalyo ngava li tambura vahameni woNompito daKavango dEhuguvaro.

[ILLUSTRATION OMITTED]

"Ruhepo yiro aru retesapo HIV no-AIDS morwa vantu kwato eyi nava rugana ntudi va tengwire tupu moyitarata," Roswitha yimo ka tanterere nEw Era. "Morwa ruhepo yiyo ava lihamesere moukaro woudona wekarokumwe panyama yipo va gwane nondya dokulya. Uvera ou kuna kuvhuka moKavango morwa ruhepo."

Kuranya yirugandona

Vakadi woMbunga zoNompito daKavango dEhuguvaro nawo kwa kere moyigongi younankondo wovakadi eyi lya gendesere Evega lyoUmpitisili woVakadi, va kulike maunongo mokutjanga nomokufaneka nomafano ngoyiruganeso yelitunturo mwene. Roswitha kwa pitisa komeho egano eli morwa aga kwa kara nepuro eli asi kupa vakadi nonkondo kuvhura kurangapeka ehaneso lyo-HIV no-AIDS. "Nsene ose vakadi tu dira kudiva unakondo wetu, kapi tatu kara nomukumo gokusikama tu pure unankondo wetu nyamwetu. Omu nina kugazara twa hepa kukara nomalikwamo gokupwaga tuka tuka gwane vakadi womonomukunda dokomambo. Vakadi va hepa kulironga omu nava ranya ndi rwanesa nokunyoka yiruganadona yopampo eyi ayi tu silike unankondo wokulipopera nyamwetu nomarutu."

Roswitha kwa tameka moRundu mbunga zovakadiezi ava tumbura asi "Unankondo woVakadi mElisinto," va divilisise asi unene po vakadi va kara no-HIV no-AIDS va dive unankondo wawo, ntani kuvhura va singonone nokukohonona vene maudigu gawo mokukwama Ngendesoveta zaNavenye zo-HIV no-AIDS ezi kazitambwire parlemende ntaantani. Evega lyoUmpitisili woVakadi kwa ronga hena Roswitha momaunongo gokuuyunga nokuyengwa.

Kukorangeda woPeke

Mbunga zaKavango zEhuguvaro kwa hamena kokuronga, kupa nonkondo nokukorangeda vantu. "Ame kuna hara kutantera vakadi asi va hepa kuyitamburako nsene vana va gwana uvera ou, kapisi kutambura ko HIV no-AIDS zelike, kutambura ko yininke nayinye eyi ngayi wiza. Mwa ha zumbanesa mukumo. Mwa ha nwa yikwaepangwe noyikoreswa mu sesupike magazaro. Kapi tayi rugana. Mevega lyayo nweni nkenye apa nomutji deni nokukambadara kulya nondya dokukanguka; lihamesereni nyamweni moyiviyauka ngamoomu yigongideuro, nombungavatero, ndi moyiviyauka yongereka. Simwitireni masanseko geni; ga tjangeni. Reseni nobuke nokumona eyi vana kurugana vakadi wopeke. Tamekeni yiviyauka yokuretesa po yiwizamo ngamoomu yonondya. Uyungeni asi mwa kara nouvera ou ndi kwato. Na hara nkenye gumwe a dimburure asi nsene wa kara no-HIV simpe kuvhura o paruke eparu lyere, lyokukanguka ntani lyoruhafo.

Roswitha kuruganesa malinongweneno gamwene gouvera, edina lyedona, maudigu gomononkwara nomaudigu gokoyirugana a unge nomwenye dovantu wopeke. " Nampili ngapi gana kara maudigu gomuntu, ame ngani ga zuvha morwa ame ya horokera nge nare. Mokuwiza komaudigu gongereka, nsene tava uyunga asi awo kapi va pura monomutji dou uvera (anti-retroviral treatment) ndi eruganeso nokondomu, ame ngani za ko morwa ame muhameni goNgereka zaKatolika, ntani nsene tava uyunga kuhakura kopampo ame tani va tantere maudona aga na gwanekera nago kumwe nonongano. Ame kwa hara kukorangeda vantu ava va kara no-HIV no-AIDS va kulike unampepo wawo."

Kutara meho kumwe nomukumo

Roswitha kuuyunga asi eharo lyendi lyokuhara vana vendi yilyo ali muninkisa a kare nononkondo. "Ame kwa hara vana vange ntani kapi na hara va hepe. Nampili nsene ni fa, gombeli ga hepe kumana sure yipo a firesinka vamumbya vendi. Ame kwa hara kuparuka morwa vana vange ntani ame kapi hena nina kugazara nomfa. Ame kapi na zumbanesere mukumo nampili paapa na verere unene!"

Egano lyendi kwa kara asi a mone vana vendi vana kuru. "Ame kuna hara kumona vana vange tava livatere. Ame hena kuna hara kulironga yininke yoyipe nokudingura mavega yipo ni kare tani viyauka. Munwange gomukadona Dolly kwa hara nga kare mudivikonentu yipo nga vhure kugwana uhaku wo-HIV. Nina hara kumumona ta sikisamo sitambo sendi. Age gelike mukadona monkondwarongero zawo zomatilika ogu ga gusire sirongwa soudivikonentu ntani ame nina diva asi nga yi sikisamo morwa age mukadona ga litura merongo!"

[ILLUSTRATION OMITTED]

Pa-Robin Baumgarten naElizabeth IKhaxas

Mupiruli Karl Nairenge
COPYRIGHT 2007 Sister Namibia
No portion of this article can be reproduced without the express written permission from the copyright holder.
Copyright 2007 Gale, Cengage Learning. All rights reserved.

Article Details
Printer friendly Cite/link Email Feedback
Title Annotation:ESANSEKOHOROKA
Publication:Sister Namibia
Date:Dec 1, 2007
Words:1684
Previous Article:Omunyasha nokwe shi tambula ko Esther Sheehama ta popi kombinga yokukala u na ombuto yo HIV.
Next Article:Life expectancy is down by ten years since independence.


Related Articles
Roswitha Mushova-Ndumba: building Bridges of Hope.

Terms of use | Privacy policy | Copyright © 2019 Farlex, Inc. | Feedback | For webmasters