Printer Friendly

Okulya to longitha iitopolwa ine yomaiyuvo ihe kuwete ko nomeho.

Pantseyo yandje ngele tashi ya kokutseyitha oshinima shontumba, opo shi tseyike kapu na shoka hashi longo nawa shaashi okuninga oshinima shoka shi kale shopaumwene. Manga aantu inaa vula okuuva ko oshinima pamuthika gwawo gwopaumwene, nena, otashi kala oshidhigu noonkondo opo ya kale ye na ko na sha noshinima shoka. Ngele ku na shimwe shomiitopolwa yomaiyuvo golutu Iwoye sha yonuka sha nena otashi kala oshidhigu okudhiladhila kutya uuyuni nenge onkalamwenyo yomuntu ngoka e na sha sha yonuka oyi li ngiini. Ngame ondi uvite kutya ontseyo yandje yokulya iikulya momilaulu pehala lyokulya (orestaulanda) yedhina Le Bonne Table oyo oshilongwa dhingi monkalamwenyo yandje ayihe. Osha li oshikando shotangotango kungame, onda li shili tandi vulu okudhiladhila nkene onkalamwenyo tayi vulu okukala ngele nda ningi omuposi, kandi wete ko we.

Uuna wa thiki porestaulanda ndjoka oho indilwa wu tegelele pondje, opo wu 'thindikilwe' koshipundi shoye. Otwa li twa pulwa tu tenteke iikaha yetu komapepe gomuntu e li komeho yetu nombalambala otwa kwatelwa komeho, twa ninga elyenge tu uka momilaulu dha tya thokothoko. Omaiyuvo gokukala kuwete mpoka wu li, wa kana osho to tameke oku uva meendelelo. Ngele ondi iyadha nale ndi li ponkuma pwa luudha ngaaka, kasha li pehala inandi li mona nale. Paempito ndhoka konyala onda li handi vulu okutseya shoka nda tegelela naashoka tandi ka uva. Kuume kandje okwa fatulula onkalo ndjoka mpoka omaiyuvo getu ga ya momilaulu ongoshinima tashi tilitha noonkondo. Osha li sha fa to ende wu uka mehala lyaa na sha, nombalambala onda uvu ewi li li popepi noshipala shandje tali ti, "oshipundi shoye meme osho shika, owu shi uvite?" Omaiyuvo gekano oga li ga pitilila. Ehala olya li lyu udha ekudhilo ihe kamu na iinima mbyoka tayi vulu okukwatwa. Iinima ayihe oya li tayi kudhile nekudhilo tali yi pombanda.

Owu uvite kutya owa uka poshipundi shoye. Owa kuutumba momilaulu to popi mudho. Oto vulu oku uva omuntu ngoka a kuutumba pooha nangoye, olye ihe ano? Opo nduno ewi lyomuntu ku mu shi tali zi momilaulu sho omuntu ti ipopi kutya oye lye pamwe nomusamane gwe ngoka a kuutumba kombinga onkwawo yoshitaafula. Ondi uvite wo ewi lyakuume kandje ngoka tandi li pamwe naye. Yane yomutse otatu li omwiha pamwe. Methimbo lyoominute dhopetameko ntano sigo omulongo otwa li twa nyanyukwa nokutopolelathana shoka twi ilongo mo: "ondi uvite nda fa tandi popi muule", omeho gandje itaga lunduluka ga faathanithe onkalo", Ondi uvite ndi wete omililo tadhi shela nomalwaala nomeho gandje gokomwenyo. Ondi uvite nda fa tandi gu"--osha kwata ethimbo ele mokukala nawa e tatu tameke okutseyathana. Onda li tandi ipula momadhiladhilo kutya aaholathani mbaka otaa monika ye li ngiini. Onde ya konakona shi ikwatelela kwaashoka taa popi nopamukalo ngoka taye shi popi molwashoka osho ashike shi li po tandi vulu okuya konakona nasho.

Omuyakuli morestaulanda okwe e ta omaviinu getu, ta kutya oshikaha shandje e te shi tula kokahalasa kandje. Iikulya yetu oye ya nonda kambadhala okumona ofoloko nombele yokulitha nayo. Inashi kwatha sha molwashoka iikando oyindji ofoloko onda li tandi yi tsu ashike moshiyaha itayi tsu sha. Onda li ndi uvite nawa molwashoka kapu na ngoka e wete ndje sho nda tokola okulya onyama niikaha yowala. Osha li oshipu noonkondo. Kehe shoka nda li osha li ontseyo ombwanawa yokumakela sha inandi shi mona nale. Ondi uvite kutya poompito dhimwe onda hulitha po 'okukambadhala' okumona ko nonda thithikile e tandi li nenyanyu, nda pulakena nondi uvite iinima.

Konima yokulya okailathitho ka hugunina nokunwa omaviinu, omuyakuli gwetu morestaulanda okwe tu pititha mo. Onda li tandi ipula kutya ngiika okwa li a zala omakende ngoka haga mono ko uusiku, molwashoka andola okwe shi pondola ngiini oku tu kwatha sho twa li tatu li iikulya yetu. Sho twa zi mo morestaulanda e tatu galukile muuyelele, omeho getu onga pathima meendelelo sho taga lunduluka. Uuyuni owa li tawu monika wa yela. Ngame nakuume kandje otwa tsakaneke aaholathani mboka twa li tatu li pamwe nayo e tatu shi yolo po sho twa yooloka katu li ngaashi twa li tatu idhiladhila kutya osho tu li. Otwa pula omuyakuli gwetu kutya, "owe shi pondola ngiini"?

Okwe tu lombwela kutya okwa li omuposi. Ka twa li tu shi sha. Otwa lombwelwa kutya ongundu yaanuulema womeho mboka taa yakula morestaulanda oya kala taa ilongo uule wiiwike taa ilongo kombinga yehala, yomenu, noyankene omuntu to vulu okukwatha aantu ya ye piipundi yawo, nkene to kwatha aantu ya mone omaviinu niikulya yawo. Shika osha li oshinima sha longekidhwa. Otwe mu ithana opo e ye tu nwe mo pamwe naye. Onde mu lombwele kutya otandi ke mu kwatha e tandi mu fala kondunda yomanwino. Sho nde mu landele oshikunwa she onde shi kwata nawa e tandi shi tula nawa momake ge. Onda li nda hala a kale i inekela ndje. Onda li ndi na euvoko epe, nonando olya li lyopetameko leela kutya otashi ti ngiini okukala ito mono ko..
COPYRIGHT 2016 Sister Namibia
No portion of this article can be reproduced without the express written permission from the copyright holder.
Copyright 2016 Gale, Cengage Learning. All rights reserved.

Article Details
Printer friendly Cite/link Email Feedback
Title Annotation:TRANSLATION
Author:Rudd, Brigit
Publication:Sister Namibia
Date:Jul 1, 2016
Words:796
Previous Article:How to make a solar bottle bulb.
Next Article:Mamakadi kwa ntunga ame.
Topics:

Terms of use | Privacy policy | Copyright © 2020 Farlex, Inc. | Feedback | For webmasters