Sampa Kanga-Wilkie Ta hokolola ehokololo loshili.

Oilonga yokuninga eefilima moNamibia inai kula natango noi na eemhito dokumona omayambidido opaimaliwa da ngabekwa, ngeenge nande owa hala okudanauka eefilima paumwene. Nomolwaasho opo omunhu a findane meifano la tya ngaho oku na okukala e na eenghono. Sampa Kanga-Wilkie eenghono doludi olo muye 'edu to yele'--hinga nedina laye Sampa otali ti 'okukondjela sha' melaka laye lomoshiwana shOvazambia.

Mokudiladila omafindano aye, omunhu oto dulu okulipula kutya omahapu unene nokumonika komunhu weedula o-29. Ashike eshi she mu findanifa, eenghono daye ashike odo dihe na ongaba.

Ye mwene ohe liifana omunawino a pyokoka moikwai-kundaneki, ashike oku li omudani weefilima. Onghendabala yaye yotete yokudanauka eefilima, Imiti Ikula, oye mu etela efindano loshishani shedina Jury's Award, osho a findanene moshivilo shokuninga eefilima dounona osho kwa li sha ningilwa muHamburg, shaGermany muJuni wodula ya dja ko. Imiti Ikula osho oshinhuku shimwe shomexwata leefilima dopaiwana odo tadi ka ulikwa monakwiiwa notadi hokolola omahokololo ovanhu ovo ve na ombuto yo HIV/AIDS moilongo yomoumbuwanhu waAfrika.

"Meenghatu domOnakwiiwa, o AIDS ovo oshitukulwa sha fimana. Ehokololo lo vene otali hokolola ashike kutya nande ou kwatwe komukifi, ovanhu ve li meenghalo da yoolokafana otava twikile okukalamwenyo kwavo nokulipyakidila noinima oyo ovanhu aveshe tave i longo," osho a fatulula.

Imiti Ikula ofilima tai hokolola ehokololo lokudimbulukwa okakadona keedula 11, kedina Memory, oko kwa li haka kala momapandavanda aLusaka okudja peedula nhatu. Osha yela kutya okakadona oko, oka li ka fininikwa okukala momapandavanda nokamwaina kokamati omolwefyo laxe oo a fya komikifi da pamba o AIDS, naina okwa ka hombolwa komushamane he mu hepeke neenghono, nosha kuma Sampa.

Pefimbo ta hokolola okakadona oko, omaliudo aSampa okwa li taa ningi Nanghali koshi, Nangobe kombada, ha ningi a hafe, a udu etumba, a nyika oluhodi, a handuka. Sampa naMemory okwa li ve na ekwatafano la kola, sho osho sha kalifa Sampa ta shikula Memory oule woivike 10.

Ehokololo eli otali hokolola nghee Memory nookahewa kaye va xupa monghalo yomoshiwana osho shi hole omalwoodi, alushe otava hepekwa nokuhenukwa kuvamwaina. Pomhito imwe, kaume kaMemory umwe okwe liumbililile momilaulu te mu kongo eshi kwa li ina alukila ponhele opo kwa li hava ifana eumbo lavo, hano koshi yonhopa. Memory okwa ka hangwa a nangala pomatulilo eebesha a kwatwa onghonga, ashike hasho sha li oshikando shotete.

Sampa ota ti kutya vo nomushamane waye Simon, ou kwa li ta faneke, okwa li tava nyengwa okuehena popepi va faneke nawa ongovaningi veefilima. "Osha li shidjuu nokwa li she tu ningifa eemwenyo dii, ashike otwe ke lidimbulukifa kutya fye katu shi ovaxungimwenyo ndele fye ovafaneki," osho a ti.

Okwa fatulula kutya ngeno okwa li va kufa ombinga meenghalamwenyo dounona, ngeno ova lundulula ehokololo eli. Konima yokufaneka omafano avo, ova tokola va kwafe Memory nookahewa kaye, opo va xwepopaleke onghalamwenyo yavo. Ova tota oshikefa shoku va ongelela oshimaliwa opo ve linyolife meenhele omo hamu diinininwa ounona ovo ve na oupyakadi meenghalamwenyo davo nohava tonatelwa kooSesta. Kahewa kaMemory natango omo eli mosenda omo nota tyapula onghalamwenyo yaye ipe. Memory okwa faduka po konima yomafiku manini, ka li a hala okutambula ko onghalo yomasheko avakwao ovo kwa li have mu ula vati a fa omumati.

Eshi sha nyikifa Sampa oluhodi eshi ta fiye po ounona ovo osheshi vo naSimon va koneka eitavelo eli li li mounona kombinga yovakulunhu--kutya otave va fiye po. "Oshileshwa eshi nde lihonga mokukala nounona ovo osheshi kutya kape na omunhu wanafangwa, oo ngeno a hala ashike oikulya. Ounona ovo navo ove na eendunge, vo navo ove na yo eendjodi davo," osho a ti.

Konima eshi Imiti Ikula a pita, nokwa ulikwa moivilo yopashiwana yeefilima i dule omilongo nhatu(30), Sampa okwa kala e udite a piyaana kanini. Okwe shi yelifa kutya okwa kumwa kofilima oyo noku wete kutya okwa pumbwa a ninge sha shipe notashi kwafa. Okwe lishangifa koUnivesiti yaNamibia (UNAM) opo e lihonge oikwaikundaneki nevyulonghalo. Eshi a konakona eenghalamwenyo dovanafikola vakwao okwa didilika diva kutya okwa lie na ehokololo likwao e lihepaulule.

Onghalo yokukala nookaume okumonika nawa, okunangalafana nokukala momangungo e li mondjila osho hashi monika unene kovakainhu vomokampus, oshe mu totifa ofilima oyo hai dana ominute 20 yedina No means No (Ahowe otashi ti ahowe). Ofilima ya tya ngaho oya ulikilwa oshiwana lwotete muJanuali neudo notai ulike omakwatonghonga oo haa dulu okuningilwa ovanhu kookaume kavo, omahepeko, oupyakadi oo tau dulu u ku dile mokukala nookahewa vepipi loye nokuulika onghalamwenyo yovalihongi vatatu moUNAM.

Sampa paife oku li momudo waye omutivali, nonghalamwenyo yaye okwe i taalelifa kwaashi a kala ta lalakanene eshi a li okaana kanini. Okwa kala ta lalakanene a hala oku ka ninga omudani woinyandwa nomaulikilo aye otete okwe a ninga eshi a li e na omido 16. Meputuko laye okwa putukila pamwe noundenge vaye vavali voukadona nameme wavo oo eli omunanghono nomupu nokulonga naye, Sampa osho a fatulula ye ta ulike kutya onghalamwenyo yaye yokounona okwa li e i hafela nande a putukila moshiwana omo eendjodi dovanhu vamo iha di tu. Sampa okwa hovela okudana oinyandwa ofimbo a li keengudu dopombada, nonande inaa kala noku mu shololifa aha kufe eifano olo, fiyo a ka kala ha danene moGroundwork Theatre Network vo nakahewa kaye umwe. Pefimbo opo okwa lie na eedula 21.

Otwa kala hatu pukulula nokuudifa ko ovanhu kombinga yetandavelo lomukifi wo AIDS momido dokudja po 1990 moZambia, osho a ti. Okwa didilika kutya ovanhu pefimbo linya okwa li tava nyamukula nawa nokwa li ve na eudeko lomukifi ou. Ova longekida po eefilima dihapu pamwe nounona vomomapandavanda.

Sampa okwa longa moUnited Kingdom nomoUnited States ongomuyandjimayele monhele yokuulikila eekino nokwa ninga yo omapekapeko e a ningila oUnivesiti yaNew York Feminist Press osho yo ehangano lopaiwana ledina International Planned Parenthood Association, kombinga yovakainhu nokuya momilele.

MoNamibia okwa longa mo ongomuyandjimayele monhele yokuulikila eefilima yedina Forum for the Future, osho yo ongomukulunhuwiliki wokuhoolola ovadani vomofilima yedina Uno's World osho yo omuunganeki womayelifilo kombinga yombuto yoHIV/ AIDS mOshikondo shEhongo Lopetameko nOmifyuu-lulwakalo. Ondjokonona yaye yopailonga oya fikama po moilonga ya yoolokafana yokulonga novakwa-shiwana, osho sha tukulula omapulo kutya mbela omolwashike Sampa a hoololela oipalanyole ei ta ningi.

"Shimha ashike pe na omahokololo oshili a kuma ovanhu vonhumba, ohandi va lombwele," osho a popya. Oilalakanenwa yaye yokomesho oyo okumana elihongo laye, nokwa hovela nale okuongela omadiladilo mape oo ta ka longifa meefilima daye. Omunhu okwa pumbwa yo okulonga nomashongo oo e na sha noukwamuhoko oo haa holoka unene ngeenge tashi ya pomakongafano moshilongo omu, oo eli po natango ehe uditike ko kovanhu vamwe nohave a kwatakanifa noukoloni. Okwa pumbwa okuninga omakonakono omoule, kutya omayoolokafano opamifyuululwakalo otaa dulu okunwefa mo ngahelipi omakongafano a tya ngaho.

Sampa eshi oku shi shii nawa shaashi okwa hombolwa koshilumbu konima yeedula nhee nove na okaana kokamati keemwedi 15. Ofilima yaye imwe otai ka popya kombinga yonghalamwenyo neendjodi domulumenhu Omunamibia, oo ta lalakanene okuninga omundanishi, nonande oku li moshiwana eshi shi na omaifano oludi limwe alike, notashi dulika pa kale ovanhu vamwe vehe mu udite ko.

Sampa okwa ti kutya oku uditile onghalamwenyo yaye ei e li paife ombili. Ota kondjifa a kale ngaashi a hala nokwa hala a pewe emanguluko komushamane waye, oo e li omuyambididi waye, opo e shi ninge. "Ondi na eenghono nohai dulu okupangela onghalamwenyo yange ame mwene," osho a ti.