Natasha Tibinyane Omukainhu e na ewi: onda longa naNatasha Tibinyane mombelewa yaSister Namibia nokoKatutura Community Radio oule weedula da pita, nomolwaasho inashi kumwifa nge nokuli eshi nda didilika kutya oshilalakanenwa shaye shakula monghalamwenyo yaye osha li okukonga eemhito da yeuluka opo a yambule po ewi laye mwene.

Natasha okwa dalwa momudo 1976 nokwa kala eedula daye nhatu dotete kEpukiro Roman Catholic Mission koshitukulwa Omaheke Region, nopo nee ofamili yaye oya tembukila kOvenduka opo va ka kale nainakulu.

[ILLUSTRATION OMITTED]

Okwa dalwa omupopiliko wovakainhu

Mokudja kounona waye, Natasha ota dimbulukwa nawa kutya "eshi nda li okaana, ngeenge ndi li pomaongalelo ngaashi pomapako, peehango ile poyoongalele yeefamili, kakwa li handi udu ko kutya omolwashike ovalumenhu hava ningwa nawa, nomolwashike ve na okupewa oiyaxa yakula yoikulya, osho yo kutya omolwashike ve na okulikalekelwa vo ovakainhu tave va telekele noku va wapalekela osho yo oku va viyaukila."

Eshi a li okakadona kanini okwa li ha pula inakulu opo e mu fatululile kutya omolwashike ovalumenhu hava ningwa ngaho, nokwa li ashike ha lombwelwa kutya ovalumenhu ove na eenghono nova pumbwa okulonga oilonga idjuu, nomolwaasho ova pumbwa okupewa oiyaxa yakula yoikulya. "Ame ohandi ti, 'Naave oho longo neenghono, noho hovele okulonga okudja pohamano yongula!' 'Ahowe, osho oshinakuwanifwa shovakainhu,' osho handi lombwelwa. Ashike kakwa li handi dulu oku shi itavela, nopeedula dange dopetamekoelela onda hovela okupula kutya oilonga yovalumenhu noyovakainhu oyashike. Ohandi diladila kutya onda dalwa omupopiliko wovakainhu!" osho a ingida.

Okwa tekulwa kovakainhu ovananghono

Eshi vakwao va kala noku mu tumbaleka ongomukainhu omunanghono noha ningi omatokolo meendelelo, okwa kala ashike ha dimbulukwa ina novakainhu vahapu vomofamili yaye. "Onda kala handi kala nda dingililwa kovakainhu ovananghono monghalamwenyo yange aishe--oomeekulu, meme, noomeekulu ava va dala meme natate. Ova kala ve na omaupyakadi mahapu, hava dengwa kovashamane ile ihava kala novashamane vavo, ashike ova kala hava penduka ongula keshe, tava tekula ounona vavo, vamwe okwa li ve na oilonga, ohava i koilonga yavo, ndee tava aluka nokufya oshisho kutya ounona vavo ove na oukolele nova ya kofikola.

Natasha okwa kala he va shongo noku va pula kutya osha enda ngahelipi opo va pitike ovalumenhu vavo ve va ninge ngaho, ta ti 'nye ovakainhu ovananghono, omolwashike tamu pitike mu ningwe ngaho?' "Onda kala alushe handi lombwelwa ndi mwene, osho yo kutya vati nghi shii eshi handi popi. Natango osho ashike handi pula," ta yolo.

Okwa didilika kutya omunhu keshe ota dulu okuninga omahoololo

Okwa kala e na okapulekonawa noku na okatalekonawa a fa okaana, Natasha okwe lihonga okukala e hole okulesha ofimbo ina hovela ofikola, nota dimbulukwa kutya efimbo laye lihapu lokounona okwe li tula momambo, "shaashi opo u kale omuyuki, ito hale ashike okulonga naashi u shii monghalamwenyo yoye. Onda putuka nda nyemata monghalamwenyo yange, nonda dimbulukwa diva kutya monghalamwenyo omu na oinima ihapu oyo ito dulu okukondolola."

"Ito dulu okutokola ngeenge xo ote ku fiye po ile ite ku fiye po, ito dulu okutokola ngeenge ku na oikulya meumbo, ile pamwe oto i kofikola pokufu to fi outalala shaashi ou na ashike okambidja kanafangwa ove ku na eenghaku."

"Ashike ondi shi shii kutya nokoinima ei itandi dulu okukondolola, ondi na ashike okuninga ko sha," osho a twikila. "Onda tameka okuninga omatokolo ile omahoololo oo nda kala ndi shii kutya otaa dulu okutula nge ponghatu i li xwepo. Kakwa li ndi hole ofikola, ashike nande ongaho onda kala ndi shii kutya ondi na okupita ondodo onhi-12 opo ndi ka ninge omutoolinghundana. Oinima ei ito dulu okukondolola oi na okuholoka monghalamwenyo yakeshe umwe, ashike oove mwene ou na okuhoolola kutya oto longo nayo ngahelipi, sho eshi osho tashi eta po eyooloko."

Okwa dja mounafikola ta i moutoolinghundana

Okwa kala omunafikola po St Andrew Primary School moKhomasdal, ha danauka onetbal, ha tu eemhata, noha longo mongulu yomambo. "Onda kala ndi na ovahongi vOshiingilisha vakumwifa nonda kala ndi va hole. Ova kala ve wete kutya ondi na okapulekonawa nova kala alushe hava pe nge omambo mahapu ndi leshe tava tu nge omukumo ndi ninge shihapu nokulombwela nge oiningwanima ihapu ihafifa."

Natasha ehongo lopombada okwe li manena koConcordia College mOvenduka, ofikola yovanhu vomihoko dihapu. "Osha pula nge eemwedi dihapu opo ndi ikilile onghalo ya tya ngaho, shaashi onda kala alushe handi lombwelwa 'ino popya noilumbu' ombaadilila ohandi hongwa kovahongi voilumbu nondi li mongulu noilumbu--ounyuni aushe owa li upe kwaame. Onda didilika yo kutya okukala umulaule itashi ti kutya oumulai, ile kutya oilumbu oi na omaano unene i tu dule shaashi yo hai ningwa nawa. Otamu dulu ashike okuninga oinima aishe shi fike pamwe."

Elineekelo laye lokuninga omutoolinghundana okwa li la iwa manga moshipala konima eshi a mana omatilika molwaashi okwa li a pumbwa oimaliwa yoku ke lihongifa, nomolwaasho okwa ka longa mohotela yaVenduka ongomuyakuli wovauyimo okudja momudo 1995 fiyo 1997.

"Onda likola mo eshiivo loilonga lii, shaashi momudingonoko okwa li mu yadi oukwamuhoko. Ashike onde lihonga nhumbi handi dulu okuliamena ame mwene nokulipopila komesho yovanhu ovo, ovawiliki, osho yo oomenindjela ovo kwa li tava diladila kutya otava dulu okuninga ovanhu ngaho." Okwa kala po ngoo nee poilonga opo shaashi okwa li a pumbwa oimaliwa, ashike eendjodi daye deifano laye okwa kala he di tu natango eendjodi, nelao ole uya mondjila yaye eshi a findana mokuhanga elalakano laye loku ka longa moikundaneki.

Okwe lihanga a ninga omupopiliko wovakainhu

"Ohandi diladila kutya onghalamwenyo yange oya hovela eshi nda tameka okulonga moshifokundaneki shedina New Era," osho a popya nomesho taa konita, "shaashi olo efimbo eli nda hovela olweendo fiyo nde lihanga nokuli, nonda fika ponghatu apa ndi li nena." Okwa li momutumba umwe omo oprojeka yoRainbow kwa li tai popi novatoolinghundana kombinga yoinima ya pamba oufemba wovanhu, noinima ei opamwe nomaufemba ovakainhu oya li ye mu nyakula noya ninga oshilalakanenwa shaye shakula. Konima yeedula nhatu ta longo noshifokundaneki shoNew Era, Natasha okwa tokola kutya okwa pumbwa eshongo lipe, hano a ka longe sha shimwe shi lili, nokwa mona oimaliwa yokulihongifa okupitila mehangano ledina Konrad Adenauer Foundation opo e ke lihongele outoolinghundana ko Technikon yaNatal koDurban.

Ovahongi vaye ngaashi Ashwin Desai ine mu patulula ashike mounongo moikwapolitika ndele okwe mu patulula yo momilandu di na ko nasha nokweeta po omalunduluko nokwe mu pendulila yo ediladilo lokutya omutoolinghundana naye ota dulu okweeta po elunduluko. Konima yeedula mbali netata delihongo laye, Natasha okwa alukila koNamibia a mane omadeulo aye eemwedi hamano domalideulo opefimbo ta longo. Nande ongaho, ohokwe nelalakano laye ola li oku ka longa kombelewa yaSister Namibia, oko a kala ha longo pefimbo lomafudo aye.

"Onda kala ndi hole Sister Namibia okudja efiku lotete nde uya mombelewa yeni konima yeedula dihapu. Onda kala ndi shii oshifo sheni noitandi dimbwa efiku lotete nde uya okutala mongulumambo yeni, nonda didilika kutya onhele ei oya amenwa, ya mwena noya ngungumana nawa, omo mwa li mu na omambo mahapu nonda shakeneka mo ovanhu tava yambidida nge ovo handi dulu okuyelifila omadiladilo ange nokuhovela okupendula po ewi nomadiladilo ange moule. Onda kala alushe handi popi kombinga yoilonga yovakainhu noyovalumenhu nonda kala handi pewa oushima kofamili yange yOvaafrika, ashike Sister Namibia okwa kala nokupa nge oilongifo yokulongifa opo ndi shikule ondjila yange yomonghalamwenyo ongomupopiliko wovakainhu. Ngeno okwa li ndi na oku shi ninga ndihe na omambo okulesha ile ovanhu vokupopya navo, ngeno osha kala shidjuu, vali ngeno ewi lange shiimba ola ka kala inali udika efimbo lile."

Natasha okwa hovelele okulonga ongomunambelewakundaneki mombelwa yaSister Namibia muMarsa 2003, oilonga ei ye mu pumbwa a shonge onghalo ngaashi i li. "Okupopila ovanhu kwange okwe uya omwenyo, nonda kala handi nwefwa mo efiku keshe kovanhu ava handi shakeneke," osho a popya. "Oilyo yoManifesto yOvakainhu Ovanamibia--ovakainhu ovo hava kala komikunda efiku keshe, ovo inava mona ehongo lopombada. Ohava kala pamwe oule woshivike ndee tava kundafana kombinga yeenghalo davo; nohava kala tava hokololele nge omahokololo eenghalamwenyo davo noihandi kala nda hala oyoongaleleilonga oyo i xule."

Okwa ninga omuwiliki woKatutura Community Radio

Natasha okwa li a limbililwa eshi Sister Namibia e mu pula e mu kwafe a tungulule oKatutura Community Radio, molwaashi kakwa li unene e hole okulonga moradio. "Onda kala ndi shi shii kutya katu na vali eshi hatu dulu okuninga. Pefimbo opo kapa li vali pe na ou ta dulu oku shi ninga, omolwaasho omwenyo wange owa lambalala ondjila imwe i lili oyo inandi i diladila nale."

"Inandi kala ndi shi shii kutya ohandi dulu okuwilika ongudu yovanhu va fika po-60; okukaleka po ositaasi yoradio nokuyeendifa; okulongekida nokupitifa eeprograma nokukala menendja wositaasi, handi longo novanyasha vahapu ovo hava nwefa nge mo efiku keshe."

Okulilongekidila onakwiiwa

Peedula 29, Natasha Tibinyane okwakalaena eepulana dihapu donakwiiwa yaye. Tete okwa mona onghatu melongonghalo sha pitila mokulihonga kuye mwene koUnivesiti yaSouth Africa. Konima yaasho okwa li ta lalakanene okulonga mehangano lovakainhu pamufika wopashitukulwa ile wopaduumbo manga, ye natango ta lalakanene okweeta po eyooloko fimbo ta andjaneke eshiivo laye. Okudja opo? "Onda hala okwaaluka nokulonga moSister Namibia ongomukulunhuwiliki, kape na vali eshi tashi imbi!" osho a ingida. Konima yaasho? "Eshi ndi shii osho ashike osho kutya onda hala okulonga oshilonga shakula shi na sha nokweeta elunduluko liwa moshilongo omu. Onda ninga Meme omashendjo ongula yonena kutya aame handi ka ninga omupresidente wotete omukainhu Omunamibia!"

Ehalo la mana mo leifano laNatasha ola hovela lela kounona waye, eshi a dimbulukwa kutya "eshi osho shimwe shomoinima oyo handi dulu okukondolola. Ombili ngoo ashike onda tokola kutya itandi tungile onghalamwenyo yange mohombo ile mekwatafano nomulumenhu, shaashi ku shii kutya oshike tashi ka holoka po. Onda kala alushe handi li mono ongomuneifano lonhumba nonda hala okukala opo. Itandi ti kutya okukala omukainhu omuhombolwa ile u na ounona inashi fimana, ashike kwaame inashi fimana unene."

Okwa itavela kutya ekondjo lokukondjela oufemba wovakainhu noufikepamwe ola kwatela mo okupa ovakainhu emanguluko lokuninga ehoololo li li mondjila kombinga yeenghalamwenyo davo, noli na okufimanekwa nokuyambididwa. "Nopehe na ovakainhu tava longo oilonga i fike pamwe moshiwana ashishe ohatu dulu okudimbwa okuhanga nande olimwe lomomalalakano oo twe litulila po fye vene ongoshiwana, eduumbo ile ounyuni."

Etumwalaka laye kovakainhu ovanyasha? "Shiiva kutya oto dulu okuninga keshe osho wa hala u hange monghalamwenyo yoye, ino efa ovakwashiwana vakweni ve ku mangele nomalyenge ile ve ku patele moshipakete. Ou na ewi, nomolwaasho efa ewi loye li udike."

kuLiz Frank Etoloko kuRauna Ndinoshiho