Hoolola pokati kohombo nomwenyo?

"Ovakainhu ovahombolwa luhapu ohava mono omaupyakadi mahapu ve dule
ovakainhu ava inava hombolwa unene tuu kombinga yokuliamena koHIV,
shaashi mohombo kamu na oufikepamwe--ove ou li oumukainhu ashike.

"Ovakainhu inava pitikwa okukundafana sha kombinga yokuya momilele, omushamane oye ashike omuhona alushe. Omufyuululwakalo wetu owa kola, hano kokutya nande omushamane woye ote ku pula kombinga yelongifo lokondoma, okwa itavelwa nokutya ku na okupopya nomushamane woye kombinga yokuya momilele, ou na ashike oku mu lombwela a ninge etokolo."

Ei oyo imwe yomeekomenda dihapu da ningwa kovakainhu ovo va li va ongala moshoongaleleilonga shomadeulopukululo okudeulila ovakainhu okushanga muOktoba 2005, osho kwa li sha unganekwa kOsenda yEwiliko lOomeme oyo i lile po oomeme noukadona ovo ve na ombuto yoHIV naava va kwatwa koAIDS. Oshoongaleleilonga okwa li tashi lalakanene okutula ko enwefemo lokuhe na oufikepamwe wopaukashike kombinga yomukifi woHIV/AIDS, nokutwa oomeme omukumo va popye nova shange omahokololo avo opo a ka nyanyangidwe membo olo tali ka nyanyangidwa ledina "An Anthology on Women and HIV/AIDS."

Eedula dihapu da ka pita opa kala pe na eeprograma odo tadi udifa ko ovanhu omikalo doABC--Ino ya momilele--Kala omulineekelw a--Longifa okondoma, ndele natango omwaalu wovanhu ava tava kwatwa koAIDS onghee ngoo tau ende tau i komesho noinaku konakonwa eshi hashi ningwa po ngeenge ovanhu va idile omivelo deenduda davo, nolye ha tokola ngeenge naku longifwe okondoma ile ahowe; osho Elizabeth IKhaxas, omukulunhuwiliki wOsenda yEwiliko lOomeme a popya moshipopiwa shaye sheyeululo loshoongaleleilonga. "Nomolwaasho, otwa pumbwa okuninga oshikonga osho tashi kumu notashi kufa po oyiimbi yopanghalafano noyopashiwana oyo tai kelele omulandu woABC, oshikonga osho tashi tu kwafele tu dule okukonakona eenghalo detu dopamufyuululwakalo dopamakwatafano opakuya momilele nomashongo anghee hatu kala noukashike wetu moiwana yetu."

Ohombo otai dulu okukala etokolelo lefyo

"Momufyuululwakalo wetu iho fimanekwa ngeenge ku na omushamane," osho ovakainhu vahapu hava ti. Ashike okuhombolwa otaku dulu okukala taku ti owa tokolelwa efyo shaashi okukundafana eameno kombinga yomikifi odo hadi tandavelepakuya momilele mwa kwatelwa oHIV itaku dulika meehombo dihapu dopamufyuululwakalo. "Ovakainhu ova findilwa pedu kovalumenhu, unene momakwatafano opakuya momilele--shimha wa ti ahowe, ehengano tali shikula ko, nomolwaasho ovakainhu ihava ka pula ku longifwe eekondoma. Eemhango dopamufyuululwakalo ohadi pitike ovalumenhu va henge po ovakainhu vavo noupu, omulumenhu ota dulu okuhombola nena ndee ta hengana mongula."

[ILLUSTRATION OMITTED]

Shikwao vali, etumwalaka 'Kala omulineekelwa' kali na efatululo la faafana kovakainhu nokovalumenhu. "Okutwa ovakainhu omukumo va itavele kutya okukala omulineekelwa mohombo, otaku va amene kombuto yoHIV, nokutya inava pumbwa okulongifa eekondoma mohombo, otaku dulu yo okukala etokolelo lefyo," omukufimbinga umwe osho a popya. "Ovalumenhu vangapi ovalineekelwa? Otwa pumbwa okukala tu na oludi limwe alike lohombo, kutya nee ohombo yopamufyuululwakalo ile ekwatafano keshe, oli na okukala li na omuholike umwe auke, ohombo yovakulukadi vahapu itai tambulwa ko. Omulumenhu oku na okukala nomukulukadi umwe auke, opo a dule oku mu ulikila ohole ya wana.

Opa pumbiwa oyoongaleleilonga yovalumenhu

Ovakainhu vahapu ova popya kutya ova kendabala okuhololela ovashamane ile ovaholike vavo omaliudo avo kombinga yekelelo loHIV unene konima eshi va kundafana oinima ei moshoongaleleilonga. "Ashike ovalumenhu luhapu ihave va pwilikine. Ohava diladila kutya ngeenge ovakainhu tava popi ile tava i koyoongaleleilonga ohava ka kundafana ashike oinima yoomeme naluhapu ohava kala ve udite hatu va tilifa, nonande eshi twa hala okuninga oku va kumika ashike va kale ovaholike vetu, okutula omufindo peemhumbwe detu noku va lombwela kutya opo u tuke owa pumbwa omavava avali."

Etoloko kuRauna Ndinoshiho