Fedrwn i'm dweud na i ffasiwn gynnig.

Byline: BETHAN GWANAS 

'DI'R Steddfod erioed wedi cyrraedd yn barod? Wir rwan, mae'r wythnosau 'ma'n hedfan mor gyflym, dwi'n cael trafferth dal i fyny. Ond efallai mai mywyd i sy'n hurt bost.

Mae gen i gymaint o waith ar fy mhlat, dim ond picio i'r Steddfod am ddeuddydd, tridiau ar y mwya, alla i ei wneud eleni. Ac mi fydd hi'n braf a hyfryd, garantid, a finna'n gaeth i'r bali cyfrifiadur adre.

Ond dyna fo, alla i ddim cwyno mod i'n cael gwaith. Mi fysa jest yn neis taswn i'n gallu ei amseru o'n well.

Ond fu amseru 'rioed yn un o nghryfderau i. Dwi wastad yn cyfarfod Mr Perffaith pan mae o ar ei stag neu ei fis mel. O wel.

Mi fydd hi'n ras wyllt arna i ddydd Sadwrn: wedi trio cael rhywfaint o gwsg yn adlen fy rhieni (na, dwi byth wedi dysgu ngwers), mi fydd gen i sesiynau i'w gwneud yn y Babell Len a Phabell y Dysgwyr, ac wedyn mi fydd yn rhaid i mi rasio am fy nghar (lle bynnag fydd hwnnw) er mwyn gyrru adre er mwyn pacio er mwyn cychwyn i Gaerdydd y noson honno er mwyn cychwyn amHeathrow ben bore er mwyn hedfan i Tseina. Dwi wedi blino dim ond wrth sgwennu'r frawddeg yna. 'Tseina?' Fe'ch clywaf yn gofyn; 'Ond ro'n i'n meddwl ei bod hi wedi gorffen gneud Ar y Lein?'

Wel do. A dydi Tseina ddim ar y cyhydedd p'un bynnag. Ond mi ges i alwad ffon yn gofyn os o'n i ffansi gneud rhaglen yn dilyn yr afon Yangtze. Ym... Ro'n i wedi deud a deud mod i'm isio gneud y teithiau hirfaith 'ma byth eto, 'mod i wedi laru, 'mod i isio aros adre. Ond yr afon Yangtze?

Dwi 'rioed wedi bod yn Tseina, a dwi wastad wedi bod isio gweld y wlad honno cyn iddi newid ambyth. Ac mae'r Yangtze'n chwip o afon - yr hiraf yn Asia, y trydydd hiraf yn y byd (ar ol yr Amazon a'r Nil); 3,720 o filltiroedd.

Mae 'na ddywediad yn Tseina: 'Os nad wyt ti wedi teithio i fyny'r Yangtze fawr, ti'mwedi bod i nunlle.' Wel... alla i'm derbyn hynna na fedra?

Ac mi fyswn i'n cael gweld a'm llygaid fy hun yr argae anferthol 'na, y 3 Gorges, neu'r Tri Cheunant yn Gymraeg, ia? Y prosiect mwyaf yn hanes Tseina ers adeiladu'r Wal Fawr, yr argae sydd wedi lladd dros fil o bobl wrth ei chodi'n barod, a dydi hi'mwedi ei chwblhau eto.

Pan fyddan nhw wedi gorffen ei hadeiladu, mi fydd hi'n 400 milltir o hyd ac yn dal pumtriliwn o alwyni o ddw02C6;r.

Ydi, mae'n gwneud i Dryweryn edrych fel... wel, piso dryw yn y mor go iawn.

Mae'r argae yma wedi boddi 13 dinas, 140 tref a thros 1,300 o bentrefi. Dyna i chi argae, dyna i chi stori.

Felly nes i gytuno. Felly tra byddwch chi - a ngardd druan i - yn mwynhau Awst cynnes, braf (alla i'm credu bod 'na fwy o law ar gael i ddisgyn bellach), mi fydda i yn crasu yn Tseina am 18 diwrnod.

Maen nhw'n galw'r rhan yna yn 'Badell Ffrio Tseina'; mi fydd hi'n hurt o boeth, annoddefol hyd yn oed. Dwi bron yn siwr bod rhywun wedi deud ei bod hi'n gallu cyrraedd y 50au00BO; yna. Ydw i'n gall dwch?

Felly bydd, mi fydd Del druan yn gorfod byw hebdda i am gyfnod golew eto.

Os ydach chi'n un o'r bobl sydd wedi laru darllen am'y bali ci', gewch chi orffen darllen y dudalen yma rwan. Ond os ydach chi'n un o'r nifer anhygoel sydd wedi deud eich bod chi isio gwybod mwy o'i hanes hi, mwynhewch:

Dwi'n dal i ddeud mai dyma'r penderfyniad gorau wnes i erioed. Mae hi wedi tyfu'n arw bellach a hithau'n saith mis oed, ond mae hi'n dal yn hynod o ddel a ffeind.

Ydi, mae hi'n colli ei blew braidd, ond mae hynny'n golygu mod i'n gorfod tynnu'r hwfyr allan yn amlach. Mae'r blewiach yn tueddu i hel yn y gwe pry cop, felly does gen i'm dewis.

Bob bore, dwi'n cael y croeso rhyfedda, ac o'r herwydd, mae pob diwrnod yn dechrau'n dda - mae rhywun yn fy addoli i!

Iawn, mae hi'n gallu rhoi croeso braidd yn rhy frwd i mi weithiau, fel wythnos dwytha, pan gnociodd ei phen yn erbyn fy moch a rhoi hymdingar o lwmp a chlais i mi. Ond allwn i ddim peidio a maddau iddi.

Pan fydda i'n dod nol wedi cyfnod hir dramor, mae hi'n gwirioni gymaint, mae hi'n gwlychu ei hun, bechod. A dwi'n cael fy llyfu'n rhacs. Mae Mamyn gwaredu, 'Gei di lyngyr!' ond duwcs, dwi'n siwr o gael pethau gwaeth ar lannau'r Yangtze.

Gan 'mod i'n mynd a hi am dro cyn brecwast bob bore, ac yna am sbrint efo'r beic ddiwedd pnawn, dwi'n fwy ffit na fues i ers talwm.

Mi ges i lawdriniaeth bychan ar fy mhen glin wythnos dwytha, ac roedd curiad fy nghalon i'n 55 - 'Www, very fit!' meddai'r nyrs. Ro'n i wedi gwirioni. Dwi'n eitha siwr bod 'na wen fel giat ar fy wyneb pan ges i fy rhoi i gysgu.

Cofiwch chi, mae hi wedi rhoi hartan i mi fwy nag unwaith. Fel pan redodd hi ar ol wiwer lwyd (a'i dal hi) yn frawychus o agos at ddibyn uwch ben yr afon Wnion a honno mewn lli ac yn rhaeadru heibio'n frown a gwyllt.

Neu fel neithiwr, pan rois i lifft adre i ffrindiau a'u ci oedd wedi cerdded draw i'n gweld ni ond bod y ferch isio mynd adre i weld Big Brother.

Mi wnes i adael Del yn yr ardd fel arfer, ond roedd hi wedi ngweld i'n gadael ci arall i mewn i'r car yndoedd?

Ro'n i'n bomio i lawr y ffordd fawr pan glywes i 'Anti Bethan! Mae Del tu ol i ni!'

O nefi wen, roedd hi ynghanol y ffordd, yn rhedeg ar ein holau, yn udo fel peth gwirion. Mae'n rhaid ei bod hi wedi gwasgu drwy'r twll yn y wal lle mae'r ffrwd yn rhedeg i'r ardd a dod allan i'r ffordd fawr drwy'r goedwig. Mi lwyddais i'w chael i redeg i'r ochr cyn i gar sgrialu rownd y gornel.

Doedd curiad fy nghalon i ddim yn 55 bryd hynny, mi allwch fentro. Dwi wedi prynu tsiaen pnawn 'ma. Mi redodd ar ol pic yp Dad y diwrnod ro'n i'n dod nol o Gabon hefyd. Mi nath o stopio, ond doedd hi'm isio neidio i mewn i'r pic yp yn y diwedd, felly wedi ei gwylio'n rhedeg yn ol amy ty02C6;, mi aeth o'n ei flaen. Ond mae'n rhaid ei bod hi wedi newid ei meddwl.

Doedd Mam ddim wedi dallt ei bod hi ar goll nes i'r posmon ddod a hi i'r ty02C6; yn ei fan - roedd o wedi dod o hyd iddi ar y groesffordd yn Bontnewydd. Mam druan... mi gymrodd sbel iddi allu deud yr hanes wrtha i.

Ers hynny, mae hi wedi bod yn y pic yp efo Dad, ac mae o'n deud bod 'na "ddigon o elfen ynddi". Dyna sut mae ffermwyr yn disgrifio ci defaid sy'n dangos potensial mae'n debyg. Roedd o'n glanhau'r defaid y diwrnod o'r blaen, a bob tro roedd o'n gollwng dafad yn rhydd i'r cae, mi fyddai Del yn dod a hi'n ol.

Doedd o'm isio iddi ddod a hi'n ol, ac roedd o'n gweiddi "Aros!!!" arni nes roedd o'n biws, ond "diaw, roedd hi'n dipyn o foi yn gallu dod a bob un yn ol," meddai.

Oedd, tad. A siawns na fydd hi wedi arfer gwrando ar ei lais yntau erbyn i mi ddod yn ol o'r Yangtze. Mae hi'n aros pan fydda i'n gweiddi arni. Wel, weithia... tynnu ar ol ei meistres tydi?

Mae rhywun wedi deud ei bod hi'n gallu cyrraedd y 50au00BO; yna. Ydw i'n gall dwch?

CAPTION(S):

Mae Del yn dda efo plant hefyd! A marc y blaidd sydd ar ei chynffon yn ol Cledwyn Fychan. Isod, yr Yangtse fawr Llun Bethan Gwanas