Dathlu celfyddydau yn yr ysgolion.

BYDD plant mewn 13 o ysgolion led-led Gwynedd a Mon yn cael cyfle i fanteisio ar arbenigedd celfyddydol diolch i gynllun grant Asiantaeth Gelfyddydol Ysgolion Gwynedd a Mon.

Caiff y cynllun ei ariannu gan bartneriaeth rhwng Cyngor Gwynedd, Cyngor Ynys Mon, Cynnal a Chyngor Celfyddydau Cymru.

Mae'r cynllun yn cefnogi cynlluniau dawns, cerdd, drama a chelf mewn Yn ddiweddar, dyfarnwyd cannoedd o bunnoedd i wahanol gynlluniau er mwyn hyrwyddo gweithgareddau celfyddydol mewn ysgolion drwy alluogi artistiaid, cerddorion, dawnswyr a llu o dalentau eraill gynnal gweithgareddau efo'r plant.

Gweithgareddau sy'n ychwanegol i wersi arferol fydd y rhain, sy'n hwb i chwilfrydedd plant am y celfyddydau.

Ymhlith y cynlluniau sydd wedi derbyn nawdd gan yr Asiantaeth Gelfyddydol y tro hwn bydd plant yn Ysgol Gynradd Dolbadarn, Llanberis yn creu murlun ar y thema 'Ddoe a Heddiw' i nodi pen-blwydd yr ysgol yn 70 oed.

Creu murlun yw bwriad Ysgol Llanaelhaearn hefyd tra bydd plant Ysgol y Gader, Dolgellau yn cynnal gweithdai drama, dawns breakdance a cherddoriaeth roc a phop fel rhan o wythnos weithgareddau blynyddol yr ysgol.

Cynllun ffotograffiaeth a fydd yn cofnodi ciplun o fywyd Ysgol Glancegin a stad Maesgeirchen ar achlysur pen-blwydd yr ysgol yn 40 oed. Bydd y lluniau yn cael eu harddangos yn yr ysgol ac yn y gymuned.

Ym Mon bydd disgyblion Ysgol Uwchradd Caergybi yn cael cyfle i gymryd rhan mewn gweithdai cerddoriaeth jazz. Bydd cyfle hefyd i berfformio mewn gwyl gerdd.