Cyffro'r cystadlu mewn cyngerdd campus.

'DWI'N gwybod sut maen nhw'n teimlo," meddai'r gantores, gyfansoddwraig, ac yn awr, cyflwynydd, Elin Fflur, wrth son am gystadleuwyr Ysgoloriaeth Bryn Terfel.

Bydd cyngerdd arbennig yn cyflwyno perfformiadau gan y chwe pherson ifanc sy'n cystadlu am yr ysgoloriaeth eleni yn cael ei darlledu ar S4C nos Sul. Elin fydd y tu cefn i'r llwyfan yn Neuadd y Stiwt, Rhosllannerchrugog, yn sgwrsio a'r cystadleuwyr ac yn cyfleu awyrgylch y digwyddiad.

Cyflwynydd arall y noson yw Rhodri Owen.

"Mae'n beth newydd i mi, ond mi rydw i wedi mwynhau cyflwyno'r gyfres gerddorol Nodyn, ac rwy'n edrych ymlaen at noson yr ysgoloriaeth," meddai Elin, sy'n byw yn Llanfairpwll ar Ynys Mon.

"Mi fyddai'n teimlo'n nerfus, ond dwi'n gwybod sut beth ydi o i gystadlu. Mi fues i'n cystadlu mewn eisteddfodau pan oeddwn i'n ifanc, a dwi dal yn teimlo'n nerfus wrth gamu ar lwyfan. Dwi'n meddwl fod hynny'n wir am bob perfformiwr, oherwydd bod chi ddim yn gwybod sut mae'r gynulleidfa am ymateb.

"Ac wrth gwrs, bydd cystadleuwyr yr ysgoloriaeth hefyd yn wynebu panel o feirniaid sy'n rhoi pwysau ychwanegol arnyn nhw. Dwi'n teimlo drostyn nhw."

Oes ganddi air o gyngor? "Gwnewch yn siwr eich bod chi wedi paratoi'n drylwyr, sy'n eich galluogi wedyn i fod yn hollol hyderus. Ewch amdani!"

Mae'r chwech wedi cyrraedd llwyfan Cyngerdd yr Ysgoloriaeth drwy ennill eu cystadlaethau unigol yn Eisteddfod Genedlaethol yr Urdd eleni. Bydd enillydd yr ysgoloriaeth yn cael pounds 4,000 a'r cyfle i berfformio gyda Bryn Terfel ei hun yn Theatr Donald Gordon, Canolfan Mileniwm Cymru, ym mis Mai'r flwyddyn nesaf, i agor Eisteddfod Genedlaethol Urdd Gobaith Cymru Bae Caerdydd 2009.

Y chwe chystadleuydd fydd yn ceisio creu argraff ar y beirniaid eleni yw Elen Gwenllian o Gaernarfon, Elliw Mai o Riwlas ger Bangor, Glesni Fflur o Lanfor ger Y Bala, Mared Emlyn o Eglwys Bach, Conwy, Rhian Lois Evans o Bontrhydygroes, Ceredigion a Tudur Phillips o Fryn Iwan ger Caerfyrddin.

Y prifardd Tudur Dylan Jones yw cadeirydd panel y beirniaid, a gweddill aelodau'r panel yw'r cyfansoddwr a'r arweinydd Brian Hughes; y pianydd Llyr Williams; yr arbenigwr cerdd dant a chanu gwerin, Leah Owen; yr arbenigwr dawns Prydwen Elfed Owens; yr athro drama Peter Davies; a'r arbenigwr llefaru Sian Teifi.

Yn y cyfnod yn arwain at y cyngerdd, mae'r cystadleuwyr wedi mynychu gweithdai gyda thiwtoriaid arbenigol. Bydd cyfle i ddilyn eu hymarferion mewn rhaglen heno.

Ysgoloriaeth Bryn Terfel 2008 S4C, heno, 9.45pm; Cyngerdd Ysgoloriaeth Bryn Terfel 2008 S4C, nos yfory, 8.30pm (s4c.co.uk/cerddoriaeth)

CAPTION(S):

Elin Fflur