Cyfaddef, efallai i mi fod yn rhy llawdrwm ar ein cenedl fach ni.

Byline: RHYS MWYN

A ICs - Artistiaid Ifanc Cymreig. Roedd un o fy artistiaid, Jeb Loy Nichols, yn arddangos ei waith celf yn Oriel AMUTI yn Llundain, felly dyna esgus bach reit dda i dreulio cwpl o ddyddiau yn y ddinas fawr yn ddiweddar, yn mynychu'r noson agoriadol ac wedyn cael cwpl o gyfarfodydd busnes y diwrnod wedyn.

Ystyr AMUTI yw Aquarium, Ministry for the Uninspired, Talentless, Ill-informed, ond cyn i chi gam ddeall hyn yn llwyr, mae angen eich sicrhau fod hyn yn "eironig".

Is - oriel mewn ffordd yw'r AMUTI i'r hen AquariumGallery sydd bellach wedi symud i safle mwy ar Farringdon Road a'r AMUTI sydd nawr wedi ymgartrefu yn yr oriel fach ar Woburn Walk ger Euston.

Wrth i mi gyrraedd yr AMUTI a Jeb dal yn brysur yn gosod ei brints-coed o arloeswyr hip hop (hon oedd yr un sioe a fu yn Capsule, Caerdydd yn ddiweddar) rwyf yn gweld posteri ar y llawr wedi eu harwyddo gan Jamie Reid, a bocsus o waith celf Jamie ar lechi (a ddaeth o Ogledd Cymru drwy bartneriaeth a Chwmni Inigo Jones).

Yr anhrefn arferol celfyddydol felly.

Gwaith gwerthfawr ar y llawr, pethau ymmhob man, dim ond tair awr nes fod y sioe yn agor. Neb yn poeni.

Dechreuais sgwrsio gyda Lawrence, curadur yr Oriel, "hogyn-llydan", bler yr olwg, gwallt cyrliog heb ei gribo, Cockney go iawn, "aawlright mate - you Jeb's manager are you? wanna beer?"

Roedd Lawrence yn cadw golwg ar yr anhrefn o du cefn cowntar ei oriel (yn ogystal a llwytho rhew i bwcedi ar gyfer y poteli cwrw nes ymlaen).

Holais amy cowntar diddorol, wedi ei gynllunio o hen bympars ceir.

Cam-ddehonglais y cowntar fel hen jukebox ond na roedd stori llawer mwy diddorol na hynny.

Eglurodd Lawrence fel bu iddo brynu'r hen gowntar (amrai miloedd) gan Vivienne Westwood. Hwn oedd y cowntar gwreiddiol yn siop Malcolm MacLaren a Vivienne Westwood ar y King's Road, siop "Sex", "World's End" a "Seditionaries" yn ei thro.

Yn wir roedd Lorraine, gwraig Jeb yn cofio mynychu'r siop yn ol yn y 70au ac yn cofio'r cowntar.

Tu mewn i'r gwydr roedd llun wedi ei arwyddo gan Iggy Pop.

Chwerthais i a Jeb - da ni'n trio'n gorau i osgoi "punk rock" ond does dim dihangfa!

Y bore wedyn mae'n arllwys y glaw yn Llundain a dwi'n cerdded o fy ngwesty bach o focs yn King's Cross draw tuag at Soho i gyfarfod a chwmni recordio 1965 sydd newydd arwyddo un arall o fy artistiaid.

Dydi hi fawr o daith, falle ugain munud o gerdded ond mae hi mor anhygoel o wlyb a dwi'nna mor fuan dwi'n penderfynu taro mewn i'r Amgueddfa Brydeinig os ond i osgoi y glaw.

Er mai 10 o'r gloch ar fore Iau yw hi, mae cannoedd yma yn ciwio i weld arddangosfa y "First Emperor".

Holias un o'r staff; roedd rhaid ciwio am dros awr er mwyn archebu tocyn ar gyfer rhai oriau yn ddiweddarach. Dim diolch; dim amser yn anffodus.

Gwibiais mewn i'r Oriel Eifftaidd a threuliais hanner awr braf yn astudio'r garreg Rosetta.

Hon oedd y garreg dair ieithog a ganiataodd i archaeolegwyr ddehongli hieroglyphics gan fod sgrifen Roegaidd ar y garreg hefyd a gan fod y dair sgript yn dweud yr un peth.

Cofiais y wefr a gefais fel hogyn bach o fynychu llefydd fel hyn, does dim cystal a mummies nagoes?

Yn ol allan i'r glaw, cyfarfod yn Soho a digon a amser cyn dal y tren adre o Euston i gerdded heibio Farringdon Road i weld yr Aquarium newydd.

Mae'r llawr isaf yn llwyr ar gyfer arddangosfa diweddara Jimmy Cauty o'r KLF gyd'i ddehongliad beiddgar o stampiau gyda wyneb y Frenhines mewn gas-masks. Iraq mae'n debyg sydd wedi symbylu hyn.

Mae gan Cauty bosteri anferth yn ogystal a llyfrau stampaiu ar werth.

Cefais daflen, ond fe'i collais rhywsut ar y siwrne adre.

Mi roedd 'na amser lle byddai rhywbeth fel hyn wedi fy ysbrydoli yn llwyr ond amryw reswm dwi'n teimlo diffyg-gwefr.

Dwi'n gwybod fod Cauty, Reid a'r math yma o waith celf gwleidyddol wedi lliwio fy ngwleidyddiaeth unwaith. Yn wir roedd gwaith diweddar Reid yn dangos "hoodies" ac yn datgan "God Bless our Youth" - do mi chwerthais.

Eto dwi'n credu fy mod angen i hyn fod yn berthnasol i Gymru rwan. Mae fy ngwleidyddiaeth wedi cael ei ffurfio, er ei fod wrth reswmyn esblygu hefyd, felly fel dwi'n gofyn o hyd, "lle mae'r Jimmy Cauty Cymraeg?"

A braf iawn gallu cynnig ateb. Fe agorwyd "siop gelf" mewn hen siop wag ar 27 Stryd Llyn yng Nghaernarfon dros un penwythnos yn unig yn ddiweddar. Gweledigaeth yr artist Sian Green a wireddwyd drwy gyd-weithrediad Oriel Dafydd Hardy oedd y siop a gwerthu cynnyrch artistiaid ifanc Cymreig (AICs) oedd y bwriad; popeth ar werth ambrisiau rhesymol o pounds 2.50 hyd at pounds 50.

Ymhlith yr artistiaid roedd y ffotograffydd Dewi Glyn Jones; Mik Artistik a'i bortreadau ar fagia papur brown; Geraint Thomas a'i luniau o gastell Dolbadarn; Huw Erddyn wrth gwrs a'r slogannau Cymuned-aidd; paentiadau Menna Thomas; prints Charles Yorke a gwaith gan Gwyn Williams, Gethin Jones, Iestyn Owen, Paula Hampson a llawer mwy.

Roedd brooches bach Buddug yn fregus ond yn wefreiddiol, model/puppet Dic Aberdaron gan Gwyn Williams wedi gwerthu allan yn llwyr ac yn y selar Cymdeithas y Rhyfeddod yn dangos ffilmiau i gyfeiliant synnau electroneg rhai o aelodau Tokyu.

Hyn yng Ngogledd Cymru nid Farringdon Road, ac oedd mi oedd 'na bobl, nifer fawr ohonynt, yn prynu gwaith celf gan yr AICs.

Dwi 'di bod mor negyddol am ddiffyg cefnogaeth y Cymry tuag at ddiwylliant a'r celfyddydau yn ddiweddar mae'n braf teimlo fy mod efallai wedi bod yn llawdrwmar ein Cenedl fach ni.

O ran dod o hyd i'r Jimmy Cauty Cymraeg mae'n debyg mai'r ateb i'r cwestwin oedd "Speak Our Language - Baah!" llun o ddafad gan Huw Erddyn - dyna'r llun mwyaf doniol a pherthnasol rhywsut - llun ddylia fod ar glawr CD gan grwp pop - ella dylia Huw weithio hefo'r Stilettoes neu rhywun!

Gai'r clod am fachu'r enw AIC's?

Dwi 'di bod mor negyddol am ddiffyg cefnogaeth y Cymry tuag at ddiwylliant a'r celfyddydau

CAPTION(S):

Huw Erddyn - un o'r artistiaid fu'n dangos ei waith mewn siop wag yng Nghaernarfon cyn y Nadolig