5. Onthou.

5. Onthou

   Na vermoedelike skilderye (dalk fliektonele)

   Oggend glip 'n oopgelate venster binne,
   blakend--
   'n blonde jongeling
   teen die donker voue skuifgordyn;

   stryk oor 'n pluistapyt se pienk (of: groen olyf);

   ets spitse af
   van hoehakskoene, uitgeskop
   (frommelings van 'n rompie in die skemer voorgrond?);

   talm, bloesend, by newels bra en broekieskous;

   vleg plooiings
   pastel-lig
   in 'n afgevalle laken;

   laat fasette skitter in 'n smuktafel se kristallyne vrag;

   ontwaar oplaas
   op 'n perlemoenglansbed
   haar gelate naaktheid

   --roep sinsverrukkings voor die gees:
   ledemate van die maan in gaasgordyne
   windbeweeg
   snakke uit gevalle klere wat opslaan in parfume wat afgee aan
   strelings huid en haar wat reikhals na oorstelping ...

   heter dade handvoltrek
   tot 'n skouspel woordstorting.