3. rokname.

3. rokname

   iets naamloos dore en blind
   hardnekkig het ons twee
   laat weier om mekaar
   van jongs af prys te gee ...

   juwele die onthou ek eintlik nie,
   van hoede toentertyd met tulle
   onthou ek vaag. maar rokke
   so baie helderte het ek van hulle

   daar was die houtskoolrok
   met Ioodgrys kolle, tarentaal.
   die een met troupantkleure
   haar naam was fluister-asemhaal-

   van-blomme
   as jy loop
   of hier en daar selfs in 'n stoel
   doodstil rondsit.
   die bloue was my-hart-voel-

   klop-onder-my-bors.
   die swart-en-wit-gestreepte een: sebra
   vir meestal net vanaand
   met uitgaan dra

   en dan 'n pronksingvink
   die ene swart en geel
   hang aan 'n graspluim wat die wind
   wat oor haar gaan sag streel

   daar was 'n nuwerwetse een
   met ingeweefde kreuk
   hoe mens haar ook al was of stryk
   met byna vleeslik haar eksoties vreemde reuk ...

   en toe jy kwalik was en skuifelend
   het ons 'n nuwe weer gekoop
   en lieg-lieg lag-lag het ons haar
   stilstreel-en-saggies-soen gedoop

   en dan was daar 'n allerlaaste een
   ontwerp deur hartseerliefde, nee!
   so menslik op ons afgedwing
   te onvertaalbaar nee! nee!
   om haar 'n naam te gee