2. Piekniek, miskien 1971.

2. Piekniek, miskien 1971

   Waar die groot omhaal van son en wolke oop verloop
   --in 'n streek waardeur hoofwee afgemete mik
   op elders--plaasgeluide aanspoel en toeslik--
   gooi hulle eendag 'n deken op die ouwerf oop;
   uit saalsakke word plaat en platespeler gehaal
   (Debussy se Faun?), en skons, 'n warmfles met tee;
   in die ru boord kry hulle nog 'n vrug of twee;
   en later staan hul voor mekaar, skaamwonderkaal;
   maar niemand daar met voorgevoel vir ou verraad nie
   --nie hy of sy nie, bevange van hul jong geluk,
   nog die perde wat bekke kweek die weft af pluk--en
   geen oomblik het die dag getalm in sy vaart nie.
   Net die geheue wat hul soms nog parte speel,
   'n vervalle tuin se ongeskondenheid verbeel.