'Fues ti erioed yn gysylltiedig a Duffy?' RHYS MWYN.

IGWYDD taro mewn i Gaffi'r Penwaig yn Nefyn, mae'n un o'r caffis bach da 'na fyddai'n grybwyll yn y golofn o dro i dro, caffi lle mae'r sgwrs yn Gymraeg, y croeso yn gynnes a paned yn baned iawn.

Wrth i ni eistedd lawr dyma daro clust ar sgwrs pedair gwraig oedrannus ar y bwrdd yn y gornel.

"Mi welais hi ar Jonathan Ross" meddai'rgyntaf. "Ohhh ar Jools Holland welais i hi a mi oedd hi'n dda," meddai'rail.

Roedd rhywun arall wedi ei gweld yn Spar Nefyn ac wedi clywed fod Paul MaCartney a Kylie wedi bod yn glen iawn hefo hi ond fod Lulu wedi bod yn annymunol iawn.

Argian dan roedd rhaid ymuno yn y sgwrs yma!!!!! Mae Nefyn wedi cael eu seren bop gyntaf a bydd rhywun yn disgwyl y bydd Duffy yn ol dros yr haf i agor Tescos yn y pentref ac yn gwneud ymddangosiad yn yr ysgol gynradd gan yrru'r plant yn wyllt wirion bost.

Flynyddoedd yn ol cofiaf sgyrsiau tebyg iawn yng nghaffis Bethesda lle roedd balchder mawr fod Maffia Mr Huws yn gwneud eu marc ar y Byd Pop.

Pobl mewn oed yn aml oedd yn mynegi'r balchder yma, roedd yr ifanc yn mynd i'r gigs ta beth, ond roedd rhywbeth hynod bositif gweld fod y gymuned leol yn gefnogol.

Reit dda rwan fod rhywun lleol yn llwyddo.

Gret, dim o'r atgasedd methodistaidd mewnblyg yna o ladd ar rhywun am droi eu cefn ar eu pentref neu am sumud i Lundain.

Dyna'r sgwrs y dyddiau yma yn y Byd Pop Cymraeg - "fues ti rioed yn gysylltiedig a Duffy?" pawb fel petaent yn trio cael rhyw gysylltiad a rhyw fewnbwn cydnabyddedig o ran datblygu gyrfa'r ferch fywiog benfelen o Ben Llyn.

Naddo chefais i ddim rhan o gwbl yng nghwrs y llif sydd bellach yn Duffy, ac mae llawer mwy bellach yn cyfaddef gan ddifaru na fyddant wedi rhoi mwy o sylw iddi cyn iddi wibio heibio pawb heb i neb sylweddoli.

Wrth gwrs bydd S4C a rhaglen "Waw Ffactor" yn gallu cyhoeddi eu bod wedi dod a Duffy i amlygrwydd a bydd Recordiau Awen dybiwn i yn meddwl o ddifri am ail ryddhau y CD "Rock, Roll & Soul" a'r gwir yw fod rhain i gyd wedi chwarae eu rhan.

Mae gennyf rhyw gof fod Robin Eiddior wedi bod yn rhyw fath o fentor iddi yn y dyddiau cynnar hefyd ond mae'n debyg mai Owen Powell, cyn gitarydd Catatonia ac un o feirniaid Waw Ffactor oedd y person mwyaf allweddol.

Roedd Powell wedi bod yn cydgyfansoddi gyda Richard Parfitt o'r grwp 60 Ft Dolls; Richard ar y pryd wedi arwyddo fel artist solo gyda Blanco y Negro, label Geoff Travis o gwmni Rough Trade ac mae'n debyg mai dyna'r linc wedyn gyda Jeanette Lee sydd bellach yn rheoli Duffy ar ran Rough Trade Management.

Mae Jeanette yn gymeriad diddorol achos fe fuodd ar un adeg yn aelod o'r grwp Public Image gyda neb llai na Johnny Rotten a hefyd yn bartner i Don Letts yn y siop ACME Attractions ar y King's Road.

Pan mae rhywun yn dechrau deall hyn i gyd mae rhywun yn dechrau gweld sut fod Duffy wedi cael y fath gefnogaeth ac wedi ei gwthio mor galed gan y cwmniau PR.

Yn od iawn fe gefais rhyw gysylltiad bach yn y stori uchod, nid o ran Duffy ond o ran y gantores Gwenno oherwydd i Powell roi galwad ffon i mi i weld os byddai Gwenno yn fodlon canu ar y demos roedd o a Parfitt yn sgwennu.

Roedd Gwenno newydd arwyddo gyda'r Pipettes a doedd ei rheolwr newydd hi ddim yn fodlon iddi wneud dim tu allan i'r Pipettes felly 'nath hynny ddim digwydd.

Dwi'n credu mai'r bwriad oedd defnyddio Gwenno ar gyfer y demos yn unig, a dwi ddim yn awgrymu am eiliad fod Gwenno wedi colli'r cyfle gafodd Duffy. Yn wir meddyliwch am y peth, mae dwy Gymraes wedi dod i'r amlwg, mae hynny'n well o lawer i ni fel cenedl na fod y ddwy yn cystadlu a'i gilydd.

Fe soniais ychydig yn ol fod y cyfnod o deimlad da yn ystod "Cwl Cymru" wedi distewi ychydig ac o ganlyniad dydi'r werin ddim wirioneddol yn ymddiddori mewn grwpiau tanddaearol Cymreig. Does 'na ddim Top of the Pops chwaith felly heblaw am Jools Holland a Jonathan Ross does fawr o gyfleoedd ar y teledu i artistiaid pop y dyddiau yma.

Beth sydd yn wych am lwyddiant cychwynol Duffy yw fod artist arall o Gymru yn dod i'r amlwg, fod Cymru unwaith eto yn cael cydnabyddiaeth fel gwlad a diwylliant sydd yn cynhyrchu ser pop.

'Da ni'n gwybod hynny wrth gwrs ond mae angen ATGOFFA pobl weithiau yn does? Dyna pam mae pobl yn chwifio fflagiau a chanu trwmpedi - mae angen ychydig o ddathlu nawr ac yn y man.

Felly does gennyf ddim diddordeb busnes yn Duffy, dim rhan yn ei gyrfa ond fel unigolyn rwyf yn falch iawn drosti ac yn dymuno'n dda iddi.

Er fy mod yn ymwrthod a chenedlaetholdeb o ran egwyddor gwleidyddol dwi yn fwy na hapus i weld artist Cymreig yn llwyddo ar y llwyfan rhyngwladol ac mae Duffy yn golygu fod un arall yna fydd mewn amser efallai yn gallu rhannu llwyfan hefo Terfel a bod yn brif artist yn Sesiwn Fawr!

Rwan i droi yn ol at y stori yn Nefyn, mae'n siwr y bydd y Bwrdd Croeso yn cynllunio "Duffy Trail" ar hyn - dyma ei desg ysgol, dyma ei chartref gyda'r plac bach glas, dyma lle cafodd ei gig cyntaf ac yn Neuadd y Dre Nefyn - dyma ei gitar cyntaf wedi ei arwyddo mewn bocs gwydr.

Bydd busnes yng nghaffi'r Penwaig yn mynd drwy'r to wrth i ffans Duffy heidio i Ben Llyn ar wylia ac yn wir bydd sgowts A&R y labeli mawr yn heidio i Dy Newydd Sarn i chwilio am "y Duffy newydd".

Yr unig gymhwyster angenrheidiol fydd cael yr enw Aimee, a wedyn meddwl am gyfenw trawiadol ar gyfer y Byd Pop. Beth am Aimee Lleyn (achos fedra nhw ddim dweud Llyn), neu Aimee Westcoast a bydd yn syniad i unrhyw grwp lleol newid enwau yn weddol sydyn.

Felly Amy Cowbois Rhos Botwnnog ac Aimee Pwsi Meri Mew, Amy Bob ac hyd yn oed Aimee Bryn Fon os 'di Bryn hefo unrhyw awydd mynd ar Jools Holland.

CAPTION(S):

Duffy - y gantores o Nefyn oeded ar frig y siartiau pop yr wythnos hon